ლაგოდეხში, სოფელ ჩადუნიანში მცხოვრები ამირან ზურაბაშვილი, რომელიც ოჯახს მიწის დამუშავებით არჩენს ტექნიკის პრობლემაზე ჩივის. ამირანის თქმით, სოფელს საკუთარი ტრაქტორი არ გააჩნია, მეზობელ სოფელში ტექნიკის დაქირავება კი იმის გამო, რომ სხვა სოფლის მაცხოვრებელია გაცილებით ძვირი უჯდება.
ძვირი მომსახურების გარდა ჩადუნიანელებს ტრაქტორის დროულად დაქირავების პრობლემაც აქვთ, რის გამოც მიწის დამუშავება აგროვადების დაგვიანებით ხდება. მიწების დიდი ნაწილი კი დასამუშავებელი რჩება.
სოფელ ჩადუნიანის მოსახლეობამ დახმარება ადგილობრივ ხელისუფლებას ჯერ კიდევ 2007 წელს სთხოვა. მაშინ, როცა სახელმწიფო პროგრამის ფარგლებში ტერიტორიულ ერთეულებზე ტრაქტორების გადაეცემა დაიწყო. იმ დროს სოფელი ჩადუნიანი მოსახლეობის არაერთი თხოვნის მიუხედავად მაინც ტექნიკის გარეშე დარჩა. ადგილობრივები რადიო “ჰერეთთან” საუბარში ამბობენ, რომ ხმა პრეზიდენტ სააკაშვილსაც კი მიაწვდინეს, თუმცა უშედეგოდ.
იმ სოფელში კი სადაც პრეზიდენტის ნაჩუქარი ტრაქტორი დღემდე მუშაობს, ამბობენ, რომ ხალისთვის დიდი შეღავათია.
დამატებითი ტექნიკის მიღებას ლაგოდეხის მუნიციპალიტეტში კვლავაც ელოდებიან. იმ შემთხვევაში თუ სოფელი ჩადუნიანი ტექნიკის მიმღებ სოფელთა სიაში ამჯერადაც არ მოხვდა, ამირან ზურაბაშვილი ამბობს, რომ მიწების დიდი ნაწილი მომავალშიც დასამუშავებელი დარჩება. სოციალურად შეჭირვებული მოსახლეობა კი ადგილობრივების თქმით, კიდევ უფრო მძიმე მდგომარეობაში აღმოჩნდება.