საქართველოს ენერგეტიკის სამინისტროში მოეწყო შეხვედრა „ნინოწმინდის მიწისქვეშა გაზსაცავის პროექტის“, საქართველოს ენერგეტიკის სამინისტროს ბუნებრივ და სოციალურ გარემოზე ზემოქმედების შეფასების სკოპინგის  დოკუმენტის განხილვასთან დაკავშირებით.  

შეხვედრას ესწრებოდნენ სამეცნიერო წრეების, საგარეჯოს ადგილობრივი თვითმმართველობის  და არასამთავრობო ორგანიზაციების, მათ შორის საქართველოს მწვანეთა მოძრაობის, მწვანე ალტერნატივას და ენერგო ეფექტურობის ცენტრის წარმომადგენლები.
 
შეხვედრაზე გაირკვა, რომ გაზსაცავი აშენდება საგარეჯოში, სოფელ ნინოწმინდაში, მოქმედ ნავთობისა და გაზის საბადოზე; პროექტის საპროექტო ღირებულებაა 270 000 000 აშშ დოლარი; გაზსაცავის ზემოთ გრუნტის სიმაღლე 2500-დან 2900 მეტრამდე მერყეობს; თვით გაზსაცავის სიმაღლე 500 მ-ია, მაგრამ გაზის დასაგროვებლად გამოიყენება სავარაუდოდ 300-350 მეტრი; გაზსაცავის სავარაუდო საექსპლოატაციო მოცულობა შეადგენს 450 მილ.მეტრ.კუბს; გაზსაცავში წნევა განვითარდება 240 ატმ-მდე; გაზსაცავში გაზის ტემპერატურა იქნება 100 გრად. ცელსიუსის ფარგლებში; დღეისათვის გარკვეული არ არის საკუთრების ფორმა. სავარაუდოდ, გაზსაცავი შესაძლოა დარჩეს, როგორც სახელმწიფო საკუთრებაში ან გადავიდეს კერძო მფლობელობაში; გაზსაცავის მომსახურეობა 1000 კბ.მ გაზის საფასურს გაზრდის  25-დან 40 აშშ დოლარამდე; სექტემბერში წარმოდგენილი იქნება კიდევ ერთი შუალედური დოკუმენტი, ხოლო 2011 წლის იანვარში საბოლოო დოკუმენტი გზშ-ს სახით.