დღეს, თელავის სამრეწველო ბაზრის დაჯარიმებულმა მოვაჭრეებმა კახეთის სამხარეო ადმინისტრაციის შენობის წინ საპროტესტო აქცია გამართეს და ჯარიმის გაუქმება მოითხოვეს.
აქციის მონაწილეებს თელავის საგადასახადო ინსპექციის წარმომადგენლები კახეთის გუბერნატორთან გიორგი ღვინიაშვილთან ერთად შეხვდნენ.
მოვაჭრეების მტკიცებით საგადასახადოს გადაწყვეტილება უკანონოა, რადგან მათ გაფრთხილება, რომ სალარო აპარატების გამოყენება აუცილებლობას წარმოადგენდა არ მიუღიათ.
თავის მხრივ საპირისპიროს ამბობენ საგადასახადოში. ინსპექციის უფროსის ვლადიმერ ქარქაშაძის თქმით, ოქმი ორ მოვაჭრეზე დაიწერა, რომლებსაც კანონით ევალებოდათ ჰქონოდათ სალარო აპარატი.
,,სტაციონარულ ობიექტებს ევალებათ ქონდეთ სალარო აპარატი, რაც შეეხება დახლებს ისინი გათავისუფლებული არიან ამისგან. ჩვენ ყველას დავურიგეთ ბროშურები თუ ვის ეკუთვნოდა გათავისუფლება სალარო აპარატისგან. რაც შეეხება ამ ორ დაჯარიმებულს, თუ თვლიან რომ უკანონოდ მოხდა მათი დაჯარიმება შეიტანონ საჩივარი სასამართლოში. მათი ჯარიმების გაუქმება არ მოხდება, მხოლოდ შეღავათს გავუკეთებთ და თანხას ეტაპობრივად დავაფარინებთ”, - განუცხადა რადიო “ჰერეთს” ვლადიმერ ქარქაშაძემ.
მოვაჭრეები სამრეწველო ბაზრის ტერიტორიაზე დაბრუნდნენ იმ იმედით, რომ მათ არავინ შეეხება მანამ, სანამ დაჯარიმების კანონიერება არ გაირკვევა.
დღეს თელავის საგადასახადო ინსპექციამ სამრეწველო ბაზრის მოვაჭრეები 500-500 ლარით დააჯარიმა.