საპროტესტო აქცია საძოვრების დაბრუნების მოთხოვნით
|
|
2010 წლის 09 03, სამშაბათი - 16:36
|
დღეს, ლაგოდეხის რაიონის სოფელ სვიდების მოსახლეობამ საძოვრების გაყიდვა გააპროტესტა და აქცია გამართა. მათი განცხადებით, სოფლის საკუთრებაში არსებული 18 ჰექტარი საძოვარი მოულოდნელად გაიყიდა, მათთვის კი ამის შესახებ ცნობილი მხოლოდ დღეს დილით გახდა, იმ დროს როდესაც მესაკუთრემ მიწის დამუშავება დაიწყო.
სვიდების მოსახლეობა უყურადღებობაში ადგილობრივ ხელისუფლებას ადანაშაულებს და საძოვრების დაბრუნებას მოითხოვს. “ჩვენი შემოსავლის ერთადერთი წყარო მესაქონლეობიდან მიღებული სარგებელია. წლების განმავლობაში საძოვრები ჩვენს საკუთრებაში იყო და ამისათვის ყოველთვიურად გადასახადსაც ვიხდიდით. ახლა კი ხელისუფლებამ მიწები გაყიდა და გამოდის რომ მშივრები დავიხოცებით”, - განუცხადეს რადიო “ჰერეთს” ადგილობრივებმა.
აქციაზე შეკრებილ მოსახლეობას მუნიციპალიტეტის გამგებლის მოადგილე დიმიტრი ლოლაძე შეხვდა. მის განცხადებით, აღნიშნული ტერიტორია სახნავ-სათეს მიწებს წარმოადგენდა და წლების წინ იჯარით იყო გაცემული, შემდეგ კი მეიჯარემ 9 ჰექტარი სახელმწიფოსგან გამოისყიდა.
დიმიტრი ლოლაძე ვერ აკონკრეტებს, რა ფორმით მოხდება მოსახლეობის მოთხოვნის დაკმაყოფილება – ადგილობრივი მოსახლეობა კი ამბობს, რომ თუ საკითხი მათ სასარგებლოდ არ გადაწყდა, პროტესტის უკიდურეს ფორმებს მიმართავენ.
|
|
|